तराई मधेसमा छठ पर्वको रौनक

0

मङ्लबार, कार्तिक २७, २०७५

काठमाडौं । तराई मधेसको मुख्य चाड छठ पर्व आज मनाइदैछ । तराई–मधेसको साझा सांस्कृतिक धरोहरका छठ पर्वको मुख्य दिन आज नदी तलाउमा भक्तजनहरुको भीड लाग्छ । सोमबार बेलुकी देखि व्रतालुहरूले निर्जल व्रत सुरु गरेका छन् । कात्तिक शुक्ल पक्षको चौथी तिथिदेखि विधिवतरुपमा सुरु हुने छठ पूजा सप्तमीसम्म चार दिन मनाइन्छ

आज परेको षष्ठी तिथिका दिन छठको मुख्य दिन हो । यस दिनलाई सँझिया घाट भनिन्छ । व्रतालुहरू आज दिउँसोको समयमा नुहाइ चोखो वस्त्र पहिरेर छठ पूजाका लागि नदी, पोखरी, तलाउसहितका जलाशयमा तयार पारिएको छठीघाटमा जान्छन् । घरका सबै सदस्य पनि नुहाइ चोखो लुगा लगाएर छठीघाटमा पुग्छन् ।

छठीघाटमा चोखो माटोले बनाइएको पूजा स्थल सिर सोता छेउमा बसेर व्रतालुहरूले छठी माता र सुर्यभगवानसंग जोडिएका पारम्परिक गीत गाउँछन् । त्यसपछि आज साँझ पख अस्ताउदै गरेका सूर्य भगवान् र छठी मातालाई व्रतालुहरूले जलाशयमा पसी बाँसको चोयाबाट बनाइएको सुपली र माटोको ढकनमा उखु,काँचो केरा, कागती, ठेकुवा, बोडी, अदुवाको बोट, स्याउ, जटा भएको नरिवल, भिजाएको केराउ, चामलको अछेता, पात सहितको मूला लगायतका फलफुल र प्रसाद राखेर अर्घ पूजा दिन्छन् ।

तीन दिनसम्म कठोर उपवास बसी मनाइने छठ पूजालाई तराइ मधेसका भोजपुरी र मैथीलीभाषीको महान् पर्व भनिए पनि पछिल्लो समय तराई मधेसमा मात्रै नभई नेपालका पहाडी भेगमा पनि छठ पूजा मनाउन थालिएको छ । मुस्लिम धर्मावलम्बीले पनि छठ पर्वको व्रत लिएर छठीमाताको पूजा आराधना गरेको भेटिन्छ ।

Leave A Reply

Your email address will not be published.