प्यूठान उद्योग वाणिज्य संघमा चुनावी सरगर्मी सुरु

0

प्यानल बनाएर व्यवसायीहरु चुनावमा होमीँदै

प्यार अलि खाँन,३ मंसिर २०७५
प्यूठान उद्योग वाणिज्य संघमा चुनावी सरगर्मी सुरु भएको छ । मंसिर २९ गते संघको २१ औं साधारण सभा तथा १० औँ अधिवेशन हुन लागेको हो । संघको अधिवेशन पुर्ब संघ अन्तर्गत रहेका ९ वटा बजार क्षेत्रमा यहि मंसिर ५ गतेबाट धमाधम अधिवेशनहरु सुरुहुन लागेको संघका अध्यक्ष ज्ञामुराम न्यौपानेले बताए । ९ वटा बजार क्षेत्रबाट अध्यक्ष तथा जिल्ला प्रतिनिधि सहित १७ जना जिल्ला कार्यसमितिमा आउने प्रावधान रहेको अध्यक्ष न्यौपानेको भनाई छ ।
७ जना पदाधिकारी रहने संघमा बस्तुगत सदस्य, मानार्थ सदस्य, एसोसियट सदस्य, निवर्तमान अध्यक्ष र निर्वाचित संघको अध्यक्षले १ जना महिला सहित ३ जना मनोनित गरि ३१ सदस्यीय कार्यसमिति रहने व्यवस्था भएको संघका निर्वतमान अध्यक्ष माधवराज भण्डारीले बताए । ‘५ गते बस्तुगत सदस्यको चुनाव हुन्छ ।’ भण्डारीले भने, ‘१७ गते भित्र ९ वटै बजार क्षेत्रका अधिवेशनहरु सम्पन्न हुनेछन् ।’ ६ गते झिमरुक बजार क्षेत्रको अधिवेशन र ८ गते प्यूठान नगरपालिका बजार क्षेत्रको अधिवेशन हुँदैछ । बजार क्षेत्र तथा संघमा नेतृत्व हत्याउन व्यवसायीहरु चुनावी प्यानलनै बनाएर अघि बढ्दै छन् । संघको भावि अध्यक्षका लागि वर्तमान वरिष्ठ उपाध्यक्ष केदारमान कक्षपतिलाई अघि सारिएको संघका पूर्व अध्यक्ष ईमानसिंह भारतीले बताए । कक्षपतिलाई राष्ट्रिय जनमोर्चा र नेपाल कम्युनिष्ट पार्टीले समर्थन गरिसकेको उच्च स्रोतले बताएको छ । संघको ७ सदस्यीय पदाधिकारीमा समेत भागबण्डा भैसकेको छ । स्रोतका अनुसार पदाधिकारीमा अध्यक्ष सहित वरिष्ठ उपाध्यक्ष र उपमहाचिव नेकपाले लिने छ भने वाणिज्य उपाध्यक्ष, उद्योग उपाध्यक्ष, महासचिव तथा कोषाध्यक्ष राजमोले पाउने लिखित सम्झौता तथा समझदारी बनेको छ । यसै गरि ९ वटा बजार क्षेत्रमा कहाँ कस्को नेतृत्व हुनेबारे पनि दुबै दलको वैठक बसी भद्र समझदारी तथा पद भाँडफाँडमा लिखित सहमती गरिएको स्रोत बताउँछ ।
संघका ९ वटा बजार क्षेत्र मध्ये प्यूठान नगरपालिका, स्वर्गद्धारी नगरपालिका, सरुमारानी गाँउपालिका, नौवहिनी गाँउपालिका र माण्डवी गाँउपालिका बजार क्षेत्रमा नेकपाले नेतृत्व लिने छ भने मल्लरानी, ऐरावती, झिमरुक तथा गौमुखी बजार क्षेत्रमा राजमोले नेतृत्व लिने समझदारी भएको छ । ११ सदस्यीय बजार क्षेत्रमा अध्यक्ष सहित ६ सदस्यीय नेतृत्व लिनेको हुनेछ भने ५ जना सदस्य दोस्रो पक्षको हुने छ ।
उता नेपाली कांग्रेस निकट व्यवसायिबाट हालका कोषाध्यक्ष रामचन्द्र पौडेलको नाम भाबि अध्यक्षका लागि चर्चामा छ भने महासचिवमा होटल व्यवसायी संघ प्यूठानका पूर्ब अध्यक्ष समेत रहेका हालका कार्यसमिति सदस्य दधिराम भण्डारीको नाम चर्चामा छ । नेपाली कांग्रेसलाई वाईपास गरेर जान खोजिएको प्रति संघका वर्तमान कोषाध्यक्ष रामचन्द्र पौडेलले आपत्ती जनाएका छन् । ‘संघमा राजनीति दल हावी भयो ।’ कोषाध्यक्ष पौडेलले भने, ‘स्वतन्त्र व्ययसायिक थलोमा राजनीतिक दलको हस्तक्षेपकारी भुमिकाले संघको बृहत्तर हित हुनै सक्दैन ।’ साना दलहरुलाई साथमा लिएर केहि दिनमै प्यानलबारे औपचारिक घोषणा गरिने पौडेलले बताए ।

Leave A Reply

Your email address will not be published.