गाउँमै रंगशाला बन्ने भएपछि स्थानीय खुसी

0

केशर राेका
४ मङि्सर २०७५

मार्सिवाङ (प्यूठान) : माण्डवी गाउँपालिका वडा नम्बर ३ स्थित नयाँगाउँ मार्सिवाङमा रहेको एक सय ५२ रोपनी खाली जमिनमा रंगशाला बन्ने भएको छ । यसअघि गाईबाख्रा चराउनका लागि प्रयोग गर्दै आइरहेको खाली जमिनमा विभिन्न खेल खेल्न मिल्ने गरी स्टेडियम बन्ने भएपछि स्थानीयवासी पनि उत्साहित देखिएका छन् । स्टेडियम निर्माणका लागि प्रदेश सरकार र गाउँपालिकाले रकमसमेत विनियोजना गरिसकेका छन् ।माण्डवी गाउँपालिकाका प्रमुख प्रशासकीय अधिकृत नारायण पौडेलका अनुसार रंगशाला निर्माणका लागि प्रदेश नम्बर ५ सरकारले ३७ लाख र गाउँपालिकाले १० लाख रुपैयाँ विनियोजन गरिसकेको छ भने त्यसका लागि विस्तृत अध्ययन प्रतिवेदन (डीपीआर) पनि तयार भइसकेको छ । ‘बजेट विनियोजन भइसकेको छ । रंगशालाको डीपीआर पनि तयार भइसकेको छ’, प्रमुख प्रशासकीय पौडेलले भने, ‘अब मात्रै स्टेडियम निर्माण प्रक्रिया सुरु हुन बाँकी छ ।’

गाउँपालिका प्राविधिक शाखा प्रमुख सागर पण्डितका अनुसार रंगशाला निर्माणका लागि भ्याटबाहेक १७ करोड ६७ लाख २० हजार रुपैयाँ लागत इस्टिमेट गरिएको छ । सो रकममा भलिबल, क्रिकेट, ब्याडमिन्टन, टेबुलटेनिस, बाँस्केटबललगायत खेलहरू खेल्न मिल्ने स्टेडियमको निर्माण गर्ने उद्देश्य बनाइएको उनले बताए । जसमा चार हजार दर्शक क्षमताको प्यारापिट र खानेपानी सुविधाका लागि ‘ओभरहेड ट्यांक’को समेत निर्माण गरिने जनाइएको छ ।

स्टेडियम बन्ने निर्णयपछि स्थानीयवासीले खुसी व्यक्त गरेका छन् । ‘खाली जमिन यत्तिकै खेर गइरहेको थियो’, मार्सिवाङका स्थानीय प्रदीप भण्डारीले भने, ‘रंगशाला बन्ने खबरले हामी सबै खुसी भएका छौं । रंगशाला निर्माण भएपछि यहाँका प्रतिभाले ठाउँ पाउने मात्रै हैन, नयाँ प्रतिभा जन्मने विश्वास लिएका छौं ।’ यो स्थानमा निकै अघिबाट रंगशाला निर्माणको अभियान सुरु गरिए पनि आर्थिक अभावले पूरा हुन पाएको थिएन ।

स्थानीय निर्वाचनसँगै आएका जनप्रतिनिधिहरूको सक्रियतामा लामो समयअघिको योजना पूरा हुने सम्भावना देखिएको छ । गाउँपालिका अध्यक्ष श्रीधर रोकामगरले आगामी पाँच वर्षभित्र रंगशालाको निर्माण पूरा गरिसक्ने बताए । ‘प्रदेश सरकार र पालिकाबाट बजेट विनियोजन गरिएको छ’, उनले भने, ‘गाउँपालिकाको गौरवको आयोजनाअन्तर्गत रंगशाला पनि हो । आगामी पाँच वर्षमा यो काम पूरा गरिसक्ने छौं ।’ नमुना रंगशाला निर्माणपछि छिमेकी जिल्ला रोल्पाका खेलाडीलाई समेत फाइदा पुग्ने उनको विश्वास छ ।
– आजको अन्नपुर्ण पोष्ट्रमा खबर छ।

Leave A Reply

Your email address will not be published.