५ वर्षभित्र चितवनका सबै बाटो पिच

0

मंसिर ६, २०७५|

चितवन– नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले पाँच वर्षभित्र चितवनका सबै बाटो पिच हुने बताएका छन्। बिहीबार भरतपुर महानगरको वडा नम्बर २४ को कार्यालय उद्घाटन र वातावरणमैत्री वडा घोषणा कार्यक्रममा बोल्दै प्रचण्डले विकासका कामका लागि आफूले पहल गरिरहेको बताएका हुन्।

आफू चुनावअघि आउँदा भरतपुर २४ को समस्यामध्ये एउटा यहाँ एक इन्च बाटो पनि पिच छैन भनिएको सम्झिँदै प्रचण्डले आफू कार्यक्रममा आउँदा पिच बाटो भएरै आएको बताए। त्यसमा आफूलाई गर्व भएको उनले सुनाए।

‘यो पूरा त भएको छैन। तर शुभ संकेत हो’, उनले भने, ‘एक वर्ष त बित्यो। अबको चार वर्षभित्र चितवन जिल्लाका सबै बाटोहरु धुलोमुक्त पिच हुनेछ भनेर तपाईंहरुलाई विश्वास दिलाउन चाहन्छु। त्यो कामको थालनी महानगरपालिका, प्रदेश सरकार र संघीय सरकारबाट भई नै सकेको छ।’

उनले भरतपुर २४ मा अव्यवस्थित बसोबास र सुकुम्बासी समस्या भएको बताउँदै त्यसलाई समाधान गर्ने बताए।

प्रचण्डले विवादमा रहेको चितवनमा क्रिकेट मैदान बनाउने र सभाहल बनाउने कुरा टुंगोमा पुगेको बताए। ‘अब क्याबिनेट मार्फत यी दुवै कुरालाई आधिकारिकता दिने समझदारी र निष्कर्षमा हामी पुगेका छौं’, उनले भने।

प्रचण्डले निर्वाचनका बेला भनिएजस्तो पाँच वर्षमा चितवन साँच्चै गर्व गर्न लायक, संसारले पनि हेर्नैपर्ने विकासको मोडलका रुपमा बनाउन सकिन्छ, बनाउनुपर्ने बताए।

Leave A Reply

Your email address will not be published.